សំនួរ ចម្លើយ អំពីជំងឺកូវីដ១៩

1 តើ​ជំងឺ​កូវីដ-១៩​គឺជាអ្វី?

វីរុសកូរ៉ូណាប្រភេទថ្មី (CoV) គឺជាវីរុសថ្មីនៃអម្បូរវីរុសកូរ៉ូណា។ ជំងឺដែលបង្កដោយវីរុសកូរ៉ូណាប្រភេទថ្មីនេះ ត្រូវបានគេរកឃើញដំបូងនៅក្នុងទីក្រុងវូហាន ប្រទេសចិន ដែលត្រូវបានគេដាក់ឈ្មោះថា ជំងឺវីរុសកូរ៉ូណាឆ្នាំ២០១៩ (កូវីដ-១៩/COVID-19) ដែលពាក្យកាត់ “CO” តំណាងឱ្យពាក្យ corona (កូរ៉ូណា) “VI” តំណាងឱ្យពាក្យ virus (វីរុស) និង “D” តំណាងឱ្យពាក្យ disease (ជំងឺ)។​ COVID-19 គឺជាវីរុសថ្មីមួយដែលមានទំនាក់ទំនងទៅនឹងអម្បូរនៃវីរុសដូចគ្នានឹងជម្ងឺរោគសញ្ញាផ្លូវដង្ហើមធ្ងន់ធ្ងរ (SARS) និងប្រភេទជំងឺផ្តាសាយទូទៅមួយចំនួនទៀត។

2 នៅ​ពេល​អ្នក​ណា​ម្នាក់​មាន​ជំងឺកូវីដ-១៩ តើ​គាត់​មាន​រោគសញ្ញា​អ្វី​ខ្លះ?

ជា​ទូទៅ​រោគសញ្ញារួមមាន៖

  • គ្រុនក្តៅ
  • ដង្ហើមខ្លី
  • ក្អក
  • ក្នុងករណីធ្ងន់ធ្ងរជាងនេះ ការឆ្លងវីរុសនេះអាចបណ្តាលឱ្យកើតជំងឺរលាកសួត ឬពិបាកដកដង្ហើម។

3 តើ​ជំងឺកូវីដ-១៩ឆ្លង​ដោយ​របៀបណា?

អ្នក​អាច​ឆ្លង​ជំងឺកូវីដ-១៩ ​ពីអ្នក​ដែលមានជំងឺនេះ ជំងឺអាច​ចម្លងតាមរយៈ​ការ​ប៉ះពាល់​ផ្ទាល់​​ទៅ​នឹង​ដំណក់​ទឹក​តូច​ៗ​ដែល​ចេញ​ពី​ប្រព័ន្ធ​ផ្លូវ​ដង្ហើមរបស់អ្នកដែលបានឆ្លងវីរុស (តាមរយៈការក្អក និងកណ្តាស់) ដំណក់​ទឹក​តូច​ៗទាំង​នោះធ្លាក់លើ​ផ្ទៃ និង​វត្ថុ​ផ្សេងៗ ប្រសិន​បើ​អ្នកប៉ះលើ​ផ្ទៃ​ និង​វត្ថុ​ទាំងនោះ ហើយ​ប៉ះភ្នែក​ ច្រមុះ ឬមាត់​ ជាមួយ​ដៃកខ្វក់ អ្នក​បញ្ជូន​វីរុស​ពី​លើ​ផ្ទៃ​ទៅលើ​ខ្លួន​អ្នក អ្នកក៏​អាច​ឆ្លងជំងឺកូវីដ-១៩ ដោយសារ​ដកដង្ហើមចូល​ដំណក់​ទឹក​តូច​ៗ​ទាំង​នោះ​ផង​ដែរ ដូច្នេះ​ហើយ​វាចំបាច់​ដែល​អ្នក​ត្រូវ​រក្សាចំងាយ​ពី​គ្នា​១,៥ម៉ែត្រ​ ពី​អ្នក​ដទៃ​។

4 តើ​ខ្ញុំ​ត្រូវ​ពាក់ម៉ាស់របៀបណា?

ពាក់​ម៉ាស់​នៅ​ត្រចៀក​ឲ្យ​ជាប់ ដោយ​ធានា​ថា​ម៉ាស់​គ្រប​ជិត​មាត់ និង​ច្រមុះ នៅ​ពេល​កំពុង​ពាក់។ ហាម​យក​ដៃ​មក​ប៉ះ​ពាល់​ម៉ាស់។ ត្រូវ​ដូរ​ម៉ាស់​ថ្មី​ស្អាត​ ប្រសិនក្នុង​អំឡុង​ពាក់​ម៉ាស់​មាន​សើម​ឬខូច។ ការ​ពាក់​ម៉ាស់​អាចជួយ​បង្ការ​ការ​ឆ្លង​រាលដាល​នៃ​ជំងឺ​ផ្លូវ​ដង្ហើម​បាន​មួយ​កម្រិត ប៉ុន្តែ​ការ​ប្រើ​ម៉ាស់​តែ​ឯង​មិន​គ្រប់គ្រាន់​ក្នុង​ការ​បង្ការ​ការ​ចម្លង​មេរោគ​ទេ គួរ​តែ​រួម​ផ្សំ​ជាមួយ​វិធានការ​បង្ការ​ការ​ចម្លង​ដទៃទៀត។

5 តើ​ខ្ញុំ​អាច​ឆ្លង​ជំងឺ​កូវីដ​-១៩ ពី​វត្ថុ​ផ្សេង​ៗ​ឬទេ?

គេ​នៅ​មិនទាន់​ច្បាស់​ទេ​ថា តើ​វីរុស​នេះ​អាច​នៅ​លើ​ផ្ទៃ​នៃ​វត្ថុ​ផ្សេង​ៗបាន​យូរ​ប៉ុណ្ណា ប៉ុន្តែ​វា​មាន​លក្ខណៈ​ប្រហាក់ប្រហែល​នឹង​វីរុស​កូរូណា​ដទៃ​ទៀត​ដែរ។ ការ​សិក្សា​ស្រាវជ្រាវ​បាន​បង្ហាញ​ថា វីរុស​នេះ អាច​នៅ​លើ​ផ្ទៃ​នៃ​វត្ថុ​ផ្សេងៗ បាន​២-៣ម៉ោង ឬរហូត​ដល់២-៣​ថ្ងៃ វា​អាស្រ័យ​ទៅ​លើ​ប្រភេទ​នៃ​ផ្ទៃ​វត្ថុ​ បរិយាកាស សីតុណ្ហភាព ។ល។ ប្រសិន​បើ​អ្នក​គិត​ថា​ផ្ទៃ​នៃ​វត្ថុ​ណាមួយ​មាន​វីរុស​ សូម​សម្អាត​ ដើម្បីការ​ខ្លួន​ឯង និង​អ្នកដទៃ​។ សូម​លាង​ដៃ​នឹង​សាប៊ូ​និង​ទឹក​ស្អាត ឬ​អាល់កុល​ហ្សែល។ ជៀសវាង​ការ​ប៉ះភ្នែក មាត់​ ឬ​ច្រមុះ។

6 តើ​ខ្ញុំ​​ត្រូវ​ធ្វើ​ដូច​ម្តេចដើម្បី​ការពារ​ខ្លួន​របស់​ខ្ញុំ​និង​អ្នក​ដទៃ?

ការពារ​មនុស្ស​គ្រប់រូបសូម​តាមដាន​ព័ត៌មាន​អំពី​ជំងឺ​កូវីដ-១៩ ដែល​មាន​នៅ​ក្នុង​ទំព័រ​ហ្វេសប៊ុក​របស់​ក្រសួង​សុខាភិបាល ឬ​តាម​រយៈវែបសាយ​របស់​នាយកដ្ឋានប្រយុទ្ធនឹងជំងឺឆ្លង។ អ្នក​អាច​កាត់បន្ថយ​ការ​ឆ្លង​ជំងឺ​កូវីដ-១៩ ដោយ​អនុវត្ត៖
– ការលាង​ដៃ​ឲ្យបាន​ញឹកញាប់​ជាមួយ​សាប៊ូ​និង​ទឹក​ស្អាត ឬ​អាល់កុល​ហ្សែល ហេតុអ្វីចាំបាច់លាងដៃ? ការ​លាង​ដៃ​របស់​អ្នក​ជាមួយ​សាប៊ូ​និង​ទឹកស្អាត ឬ​អាល់កុល​ហ្សែល សម្លាប់​មេរោគ​នៅ​លើដៃ​របស់​អ្នក​។
– សូម​រក្សា​គម្លាត​ ១,៥ ម៉ែត្រ ពី​អ្នក​ដទៃ​ ជា​ពិសេស​អ្នកដែល​មាន​ក្អក​កណ្តាស់​និង​គ្រុនក្តៅ ហេតុអ្វី? ពីព្រោះ​នៅ​ពេល​នរណា​ម្នាក់​កណ្តាស់​ឬក្អក ដំណក់​ទឹក​តូចៗ​ចេញ​ពី​មាត់​មាន​ផ្ទុក​វីរុស​ដែល​អាច​ចម្លង ទៅ​អ្នក​ដទៃ​ដែល​នៅ​ជិត​គាត់។
– ជៀសវាង​ការ​ប៉ះពាល់​ភ្នែក ច្រមុះ និង​មាត់ ហេតុអ្វី? ដៃ​របស់​អ្នកអាច​ប៉ះពាល់ឬកាន់​វត្ថុ​ផ្សេង​ៗដែល​មាន​វីរុស ហើយ​នៅពេល​អ្នក​ប៉ះពាល់​ភ្នែក ច្រមុះ ឬមាត់ វីរុស​នោះ​អាច​ចូល​ទៅ​ក្នុង​ខ្លួន​របស់​អ្នក​។
– នៅ​ពេល​ក្អក​ ឬ​កណ្តាស់​ ត្រូវ​ខ្ទប់​មាត់​និង​ច្រមុះ ដោយ​ប្រើ​កន្សែង ក្រម៉ា កែង​ដៃ ឬ​ក្រដាស រួច​បោះ​ចោល​ក្នុង​ធុង​សំរាម​ភ្លាម និង​លាង​ដៃ​របស់​អ្នក។ ហេតុអ្វី? ដំណក់​តូចៗចេញ​ពី​មាត់​មាន​ផ្ទុក​វីរុស​អាច​ចម្លង​ជំងឺ​កូវីដ​-១៩​បាន។ ការ​ខ្ទប់មាត់​និង​ច្រមុះ ដោយ​ប្រើ​កន្សែង ក្រម៉ា កែង​ដៃ ឬ​ក្រដាស អាច​ការពារ​អ្នក​ដទៃ​ពី​ផ្តាសាយ និង​កូវីដ​-១៩​ផងដែរ​។
– សម្រាក​នៅ​ផ្ទះ និង​ជៀសវាង​ការ​ធ្វើ​ដំណើរ​ ប្រសិន​បើ​មាន​គ្រុនក្តៅ​ និង​ក្អក ប្រសិន​បើ​សង្ស័យ​ថា​ឆ្លង​ជំងឺ​កូវីដ-១៩ ដោយ​មាន​គ្រុនក្តៅ និង​មាន​រោគសញ្ញា​មួយ​យ៉ាង​តិច​ក្នុង​ចំណោម​ ក្អក ហូរ​សំបោរ ឈឺ​បំពង់​ក ដង្ហើមខ្លី និង​ពិបាក​ដក​ដង្ហើម និង​មាន​ប្រវត្តិ​ធ្វើដំណើរ​ទៅ​កន្លែង​ដែល​មាន​ការ​ផ្ទុះជំងឺ​នេះ ក្នុង​អំឡុង​១៤​ថ្ងៃ​មុន​ចេញ​រោគ​សញ្ញា ឬ​ដោយ​ប៉ះពាល់​ជាមួយ​អ្នក​មាន​ផ្ទុក​ជំងឺ​កូវីដ-១៩ ត្រូវ​ប្រញាប់​រាយការណ៍ទៅ​លេខ​ទូរស័ព្ទ​ទាន់ហេតុការណ៍ ១១៥ ។

7 តើ​ខ្ញុំត្រូវ​ធ្វើ​ដូច​ម្តេច​ ប្រសិន​បើ​ខ្ញុំ​បាន​ទៅ​កន្លែង​ដែល​មាន​ផ្ទុះ​ជំងឺ​កូវីដ-១៩?

សូមធ្វើ​ចត្តាឡីស័ករៀងៗ​ខ្លួន​ បន្ទាប់​ពី​ទទួល​បាន​លទ្ធផល​តេស្តរកមេរោគកូវីដ​-១៩ អវិជ្ជមាន លើកទី១ និង​ត្រូវ​ប្រកាន់​ខ្ជាប់​នូវ​កាតព្វកិច្ច ដូច​ខាង​ក្រោម៖

  • ពាក់ម៉ាស់​ការពារ​ខ្លួន​ជាប់​រហូត
  • មិនត្រូវ​ចេញ​ពី​បរិវេណ​ផ្ទះបើសិនជាគ្មានការងារចាំបាច់
  • រក្សាគម្លាត​សង្គម និង​គម្លាត​បុគ្គល​យ៉ាង​តិច​១,៥​ពី​គ្នា
  • ត្រលប់​មក​ធ្វើតេស្ត​ម្តង​ទៀត នៅ​ថ្ងៃ​ទី​១៣ នៃ​ការ​ធ្វើ​ចត្តាឡីស័ក (ថ្ងៃ​មក​ដល់​កម្ពុជា​រាប់​ជា​ថ្ងៃ​ទី០)

សម្រាប់​អ្នក​ស្នាក់​នៅ​ភ្នំពេញ៖ សូម​ទៅ​ធ្វើតេស្តនៅ​មន្ទីរ​ពេទ្យ​មិត្តភាព​ខ្មែរ-សូវៀត (មន្ទីរ​ពេទ្យ​រុស្សី) ឬមណ្ឌល​សុខភាព​ចាក់​អង្រែ សម្រាប់​អ្នក​ស្នាក់នៅ​ខេត្ត​៖ សូម​ទៅ​ធ្វើ​តេស្ត​នៅ​មន្ទីរ​ពេទ្យ​បង្អែក​ខេត្ត

8 តើ​មាន​ការ​ព្យាបាលសម្រាប់​ជំងឺ​កូវីដ-១៩ ឬទេ?

មិនមាន​ការ​ព្យាបាល​ជាក់លាក់​នៅ​ឡើយ​ទេ។ ទោះជា​យ៉ាង​ណា​ក៏ដោយ រោគសញ្ញា​ជា​ច្រើន​អាច​ព្យាបាល​បាន ដូច្នេះ​ហើយ​ការ​ព្យាបាល​ផ្អែក​ទៅលើ​ស្ថានភាព​គ្លីនិក​របស់​អ្នក​ជំងឺ។

9 តើ​ត្រូវ​ធ្វើ​អ្វី​ខ្លះ​ក្នុង​អំឡុង​ពេល​​ធ្វើចត្តាឡីស័ក?

🏠 នៅ​ផ្ទះ​គ្រប់​ពេល​រាល់​ថ្ងៃ លើកលែង​តែ​ពេល​ត្រូវ​ការ​សេវា​ព្យាបាល​

– នៅ​ផ្ទះ​រហូត​ និង​តាមដាន​សុខភាព​ជារៀងរាល់​ថ្ងៃ

– បើ​ទៅ​មណ្ឌល​សុខភាព​ ឬ​មន្ទីរពេទ្យ​បង្អែក ត្រូវ​ពាក់ម៉ាស់​ក្នុង​ពេល​ធ្វើ​ដំណើរ​ចេញពី​ផ្ទះ

– ហាម​ជួបបងប្អូន មិត្តភក្តិ ជាពិសេស​ជួប​ឬនៅ​ជិត​មនុស្ស​ចាស់​ ឬអ្នក​មាន​ជំងឺ

– ហាម​ប៉ះពាល់​សត្វ។

🌡តាមដាន​រោគសញ្ញា​នៃ​ជំងឺ

– វាស់​កម្តៅ​ជា​រៀងរាល់​ថ្ងៃ មួ​យថ្ងៃ​ពីរដង ពេលព្រឹក​ និង​ពេល​ល្ងាច

– បើ​កម្តៅ​​លើស​ពី៣៧,៥ អង្សារសេ ឬមាន​រោគសញ្ញា​ណាមួយ ដូចជា​ក្អក ឈឺ​បំពង់ក ពិបាក​ដកដង្ហើម ត្រូវផ្តល់​ព័ត៌មាន​ដល់​មណ្ឌល​សុខភាព​ដើម្បី​ពិគ្រោះ​យោបល់។

↔️ នៅ​ដាច់​ដោយ​ឡែក​ពី​សមាជិក​គ្រួសារ

– រស់​នៅ​ក្នុង​បន្ទប់​មួយ​ដាច់​ដោយ​ឡែក ដែល​មាន​ខ្យល់​ចេញ​ចូល​គ្រប់គ្រាន់ និង​ប្រើប្រាស់​បន្ទប់​ ឬបង្គន់​ផ្សេង​ពី​គ្រួសារ​។ សមាជិក និង​គ្រួសារ​ដទៃទៀត ត្រូវ​រស់នៅ​ក្នុង​បន្ទប់​ផ្សេង​

– បរិភោគ​អាហារ​ដាច់ដោយ​ឡែក​ពី​សមាជិក​គ្រួសារ

– ពាក់ម៉ាស់​ពេលមាន​សមាជិកគ្រួសារ​នៅ​ក្បែរ ក្នុង​បន្ទប់​ជាមួយ​គ្នា ឬ​ត្រូវ​នៅ​ឃ្លាត​ពី​គ្នា​យ៉ាង​តិច​២ម៉ែត្រ។ កាត់បន្ថយ​ការ​ជួប​សមាជិក​គ្រួសារ និង​ការ​ប្រើប្រាស់​កន្លែង​រួម​គ្នា​។

🥄 ប្រើ​សម្ភារៈ​ដាច់​ដោយ​ឡែក​ពី​សមាជិក​គ្រួសារ មាន៖

– ចាន សម ស្លាបព្រា កន្សែង​ឬក្រមា គ្រែ កន្ទេល ពូក ខ្នើយ ភួយ សម្លៀកបំពាក់ និង​សម្ភារៈផ្សេង​ទៀតដែល​ប្រើប្រាស់​ផ្ទាល់​ខ្លួន

– លាង​សម្អាត​សម្ភារៈជាមួយ​ទឹក​ស្អាត និង​សាប៊ូ ឲ្យ​បាន​ស្អាត​ល្អ

– បោកគក់​សម្លៀកបំពាក់ កម្រាល​ពូក កន្សែង​ឬក្រមា មុង​ ភួយ ជាមួយ​សាប៊ូ​ធម្មតា និង​ហាល​ឲ្យ​បាន​ស្ងួត​ល្អ។

✋ លាងដៃ​អោយ​បាន​ញឹកញាប់ជាមួយ​សាប៊ូ

– លាង​ដៃ​អោយ​បាន​ញឹកញាប់​ជាមួយ​សាប៊ូ និង​ទឹកស្អាត (លាង​ដៃ​ម្តង​ត្រូវ​ប្រើ​ពេល​យ៉ាង​តិច​៤០​វិនាទី)

– លាង​សម្អាត​ដៃ មុនពេលនិង​ក្រោយ​ពេល​ចម្អិន​អាហារ​ មុនពេល​និង​ក្រោយ​ពេល​បរិភោគ​អាហារ

– ហាម​ប៉ះ ភ្នែក​ ច្រមុះ មាត់ នៅ​ពេល​ដៃ​មិនទាន់​បាន​សម្អាត​ជា​ពិសេស ក្រោយ​ពេល​ប្រើបង្គន់។

10 តើ​ខ្ញុំ​អាច​ធ្វើយ៉ាង​ណា ដើម្បី​កាត់បន្ថយ​ភាពតានតឹង ក្នុង​អំឡុង​ពេល​រាតត្បាត​នៃ​ជំងឺកូវីដ-១៩?

📞 ក្នុង​អំឡុង​ពេល​មាន​វិបត្តិ​ជា​ធម្មតា អ្នក​មាន​អារម្មណ៍​ទុក្ខព្រួយ​សោកសៅ តានតឹង​ផ្លូវចិត្ត ច្របូលច្របល់ ភ័យ​ខ្លាច ឬ​ខឹង​មួរម៉ៅ​ជាដើម។ សូម​និយាយ​ជជែក​ជាមួយ​មនុស្ស​ដែល​អ្នក​ទុកចិត្ត​ អាច​ជួយ​អ្នក​បាន។ សូម​ធ្វើការ​ទាក់ទង​និយាយ​ជាមួយ​មិត្តភក្តិ និង​ក្រុម​គ្រួសារ​របស់​អ្នក​ ដើម្បី​បន្ធូរ​អារម្មណ៍​របស់​អ្នក។

🥦 ប្រសិន​បើ​អ្នក​ត្រូវ​សម្រាក​នៅ​ផ្ទះ សូម​រក្សា​របៀបរស់នៅ​ប្រកប​ដោយ​សុខភាព​ល្អ រួម​មាន៖ បរិភោគ​អាហារ​ឲ្យ​បាន​ត្រឹមត្រូវ គេង​ឲ្យ​បាន​គ្រប់គ្រាន់​ ហាត់ប្រាណឲ្យ​បាន​ទៀងទាត់ ហើយ​រក្សា​ទំនាក់ទំនង​នៅ​ក្នុង​សង្គម ជាមួយ​មនុស្ស​ជាទី​ស្រលាញ់​របស់​អ្នក និង​តាមរយៈអ៊ីមែល និង​ទូរស័ព្ទ ជាមួយ​ក្រុម​គ្រួសារ និង​មិត្តភក្តិ​។

🚭 កុំជក់​បារី គ្រឿង​ស្រវឹង ឬសារធាតុ​ញៀន​ផ្សេង​ៗ ដើម្បី​ដោះស្រាយ​ភាពតានតឹង​ផ្លូវចិត្ត​របស់​អ្នក​។ ប្រសិន​បើ​អ្នក​មាន​អារម្មណ៍​ធុញថប់​ច្របូលច្របល់ សូម​ធ្វើការ​ពិភាក្សា​ជាមួយ​ពេទ្យ ឬ​អ្នក​ផ្តល់​ប្រឹក្សា។ ក្នុង​ករណី​ដែល​មាន​តម្រូវការ​ចាំបាច់ សូម​រៀបចំ​ផែនការ​ទុក​ជាមុនដូចជា ថាតើ​អ្នក​ត្រូវ​ទៅកន្លែងណា ហើយ​ស្វែង​រក​ការ​ជួយ​ដោយ​របៀបណាសម្រាប់​តម្រូវការ​សុខភាព​ផ្លូវកាយ និង​ផ្លូវចិត្ត​។

ℹ️ សូម​ស្វែងរក​ព័ត៌មាន​ពិត​។ ប្រមូល​ព័ត៌មាន​ដែល​អាច​នឹង​ជួយ​អ្នក ធ្វើការ​សម្រេច​ចិត្ត​ទៅលើ​ហានិភ័យ​ដោយ​ភាព​ត្រឹមត្រូវ ដូច្នេះ​អ្នក​អាច​មានការ​ប្រុង​ប្រយ័ត្ន​បាន​ត្រឹមត្រូវ​។ សូម​ស្វែង​រក​ប្រភព​ព័ត៌មាន​ដែល​អាច​ជឿ​ទុកចិត្ត ដូចជា​គេហទំព័រ​របស់​នាយកដ្ឋាន​ប្រយុទ្ធ​នឹង​ជំងឺ​ឆ្លង ឬទំព័រ​ហ្វេស​ប៊ុក​ របស់​ក្រសួង​សុខាភិបាល។

😭 សូម​កាត់​បន្ថយ​ការ​ព្រួយ​បារម្ភ ដោយ​កាត់​បន្ថយ​ការ​មើល​ ឬស្តាប់​ប្រព័ន្ធ​ផ្សព្វផ្សាយ​នានា ដែល​អ្នក​យល់​ថា ធ្វើឲ្យ​អ្នក​កាន់តែ​ពិបាកចិត្ត​។

⭐️ សូម​ប្រើប្រាស់​ជំនាញ​ដែល​អ្នក​ធ្លាប់​បាន​ប្រើប្រាស់ ក្នុង​ការ​ជួយ​ដោះស្រាយ​រឿងរ៉ាវ​​​បញ្ហា​ជីវិត​កន្លង​មក ហើយ​ប្រើ​ជំនាញ​ ឬ​របៀប​ដោះស្រាយ​នោះ មក​ដោះស្រាយ​ភាព​តានតឹង​ផ្លូវចិត្ត​របស់​អ្នក​ ក្នុង​អំឡុង​ពេល​នៃ​ការ​ផ្ទុះ​រាតត្បាត​ជំងឺកូវីដ-១៩​នេះ​។

ប្រសិ​នបើលោកអ្នកមានរោគសញ្ញាដែលទាក់ទងនឹង កូវីដ១៩ សម្រាប់ព័ត៌មានបន្ថែមសូមទាក់ទងទៅមន្ទីពេទ្យដែ្លនៅជិតលោកអ្នកបំផុត ឬក្រសួងសុខាភិបាលតាមរយៈលេខ​ទូរស័ព្ទ 115 ឥតគិតថ្លៃ

សម្រាប់ព័ត៍មានបន្ថែមសូមតាមដាននៅលើគេហទំព័រ និងហ្វេសបុកផេក នាយកដ្ឋានប្រយុទ្ធនឹងជំងឺឆ្លង

Share this post

Leave a Reply

Your email address will not be published. Required fields are marked *